Harapi i Beledijes (histori e ndigjueme në Shkodër për nji pikturë të Kolë Idromenos)
 
Personi për të cilin po flasim, njihet si Harapi i Beledijes (Harapi i Bashkisë së Shkodrës) ka hi në legjndë. Thuhet Harapi i cili thirrej kështu prej shkodranve ngaqë ishte zezak, ndoshta etiopas, ishte adjutanti i Hasan Riza Pashës. Ky njeri me portretin e tij frikshëm, sa herë kalonte rrugicave të Shkodrës krijonte panik dhe gjithnji gratë mbyllnin kanatet e dritoreve. Edhe sot në Shkodër, fëmijët praktikojnë nji lojë mes tyre, njeni nga fëmijët përplas shuplakat para syve të shokut duke i thanë shprehjen: “A e ke frikë Harapin?” Ekziston nji pikturë që asht realizue nga Idromeno në nji prej mejhaneve, afër Prefekturës së sotme, ku Harapi pinte çajin e kamomilit i vetëm në nji kthinë të rezervuar të mejhanes. Idromeno ven bast me pronarin e mejhanes, se ai mund ti bante nji portret Harapit, gja e cila ishte pothuej e pamundun, sepse Harapi ishte mysliman dhe nuk lejonte askend as ta fotografonte e aq ma tepër ta pikturonte. Por Idromeno me miqtë e tij i bajnë një “kurth” Harapit.

Aty ku Harapi pinte i qetë kamomilin e tij, nisin dike me nji kuti duhanit të mbyllun ku mbrendë kishte nji akrep. Personi i thotë Harapit se klientët në mejhane dyshonin nese ai ishte aq i fortë sa me e hapë atë kuti. Harapi i prekun në sedër aty ku kishte pikën e vet ma të fortë, merr kutinë në dorë dhe e hap. Kur sheh akrepin mbrendë, shtang mbasi e din mirë se akrepit nuk i duhet lëvizë. Nga kjo pozë e detyrueme, Idromeno prej dritores së kuzhinës mbërrin me skicue portretin e Harapit në dy minuta duke fituar kështu bastin me të zotin e mejhanes. Kështu ai realizoi gjithashtu nji nga veprat e tij ma të bukura. Vepra gjindet ne Galerinë e Arteve në Shkodër. Piktura asht pothuaj krejt e errët, në nji sfond të ërrët e aty dallohen me lehtësi vetëm sytë e Harapit dhe vathi në njenin vesh.
 
Kujtoi
Albri Brahusha