Trokitje kujtimesh – Ekspozite e Rozafa Shpuzes

Time posted: Saturday, September 19th, 2015 4:23 pm

Share on Facebook22Tweet about this on TwitterShare on Google+0Pin on Pinterest0

Mockup-1“TROKITJE KUJTIMESH”  Ekspozite Fotografie e Rozafa Shpuzës –  nga Olta Dokle

Emni “Rozafë”, mban një qytet mbi ballë, thjeshtësisht, t’gjallë. Emni “Rozafë” i ka themelet, rranjë. Tingullin, kumbonë. Kumbon ky emën, pa rreshtë, në çdo gjurmë Shkodre, e shpërthen si sythi n’degë t’njomë me çdo shkodran që vatrën len, gjithmonë për me u rikthye. Kumbon për gjithkënd që e don Shkodrën me t’tanë ndërthurjen e saj, lashtësisht të hareshme.

Thonë, emni përcjellë e trashëgon. Unë them emnin e meriton. E Rozafa Shpuza, i shkon përtej e rrugëton përmbi… Dikund lexova, mjeshtërisht e kishte shkrue: “…fati jem ishte shkrue ndër arkapijat e dyzueme të këtij qyteti fatlum.”

Rozafa shkruen, ndërsa për qytetin e sajë, ajo qendis, me germa e fjalë të kullueme shqipe, thur vërtetësisht ngjyrat e truellit që e brumosi, me andje, përkushtim, e hera-herës edhe me shqetësimin e një qytetareje fisnike të mirëfilltë shkodrane. Ajo ka botë të madhe e shpirt të çiltër artisti dhe nuk mjaftohet me pendën e mprehtë e të begatë të letrave e poezive të saja… Rozafa po-ashtu, e mban qytetin e sajë përmbi bebe t’synit. Prej 6 vjetësh, objektivi i sajë fikson detaje të çmueme e të papërsëristshme, grimca tradite e kulture, relikte që flasin histori, prag m’prag, derë m’derë…

Dyert… Këtu ka me u ndalë artistja kët’ rradhë. Ka me na dhurue nurin e qytetit të sajë, nëpërmjet trokitjeve të tyne, sa të larmishme aq edhe fort të dashtuna. Ka me na servirë një kolazh emocionesh nostalgjike, aq sa vetiake edhe të ndërthuruna si një ylber i ngjyrave të kohës, e përtejmja e të cilit e tej-mbush ngacmimin e imagjinatës dhe e ngjizë me andrrën e kapërcimit. Një pasuri dokumentuese, që pa asnjë dyshim, ka me prekë çdo bashkë-qytetar të sajin e ka me ndjellë krenari të dlirë.

Për këto dyer drite, portën mikpritëse e hapi Qendra Rinore “ARKA” – Shkodër, me 17 Tetor, ora 18:00, në bashkëpunim me “PerShkodren.com”, dhe nën mbikqyrjen e Drejtorit të Kulturës të qytetit të Shkodrës, Eugjen Gargjola.

Dy-tre fjalë për artisten.

Rozafa Shpuza leu në Shkodër në një prej familjeve qytetare ma në za, me tradita të spikatuna intelektuale dhe shoqnore. Mbasi mbaroi shkollën e mesme “Jordan Misja” 1982-1986, vazhdoi universitetin “Luigj Gurakuqi” në degën Gjuhë-Letërsi dhe e përfundoi atë me rezultate të shkëlqyeme në vitin 1990. Në vitet në vazhdim krahas punës dhe kontributeve të ndryshme, ka vazhdue me ndjekë kurse pas-universitare lidhun me profesionin por edhe pasionet e saja mbi artin e të shkruemunit dhe atë të fotografisë. Në vitin 2011 del në dritë, Libri i sajë i parë në prozë “Kohë ikonash”, një përmbledhje me “dromca letrare” siç ajo, jo rrallë shprehet, dhe në vitin 2013 botohet libri i sajë i dytë, një kurs vëllimi me poezi në gegnisht i titulluem “Anipse”. Botimet e Rozafa Shpuzës janë cilësue si pasuni letrare dhe janë vlerësue nga mjeshtra të letrave shqipe. Vitet e fundit ajo ka marrë pjesë në ekspozita dhe konkurse ndërkombëtare të ndryshme të artit të fotografisë si; “PreFoto” në Presheve; “FOKUS” në Fier; “Trashëgimia kulturore” dhe festivali i fotografisë artistike “PIMI” në, Kosovë. Krijimtaritë artistike, si në letra ashtu edhe në fotografi, Rozafa i publikon në blogun e sajë personal “Dromca…”, të cilin e pasuron rregullisht e pa kursim (http://rozafaweb.blogspot.com/2010/11/foto-nga-shkodra.html), e përveç kësaj ato gjehen edhe në forumin “Galaktika Poetike ATUNIS” (http://atunis.forumotion.com/n177-poezi-nga-rozafa-shpuza) si dhe në portalin “PerShkodren” (http://www.pershkodren.com/tag/rozafa-shpuza/) Aktualisht, Rozafa punon si redaktore letrare në Drejtorinë e Botimeve Parlamentare, pranë Kuvendit të Shqipërisë.

Olta Dokle

Foto te eventit Ekspozites “Trokitje kujtimesh” ( © Valbona Quku Lisha – All Rights Reserved )

10891896_10206997438066982_6946951370259577207_n 11221968_10206997437546969_456957343035476631_o 12080026_10206997506508693_8064497447579971579_o 12088445_10206997435426916_6515919917137535442_n 12091331_10206997433346864_6590410479752512351_o 12096068_10206997437506968_6138259336931969837_n 12096141_10206997436946954_7015962132252336056_n 12096370_10206997506748699_6850037996581500612_n 12107833_10206997608191235_2949696860795795336_n 12120163_10206997608311238_7380478976288601919_o 12132371_10206997433106858_3290718175848406566_o 12138607_10206997434426891_7983478188107749512_o 12140106_10206997434386890_3632669514181992317_o 12141519_10206997431906828_5469319411468937988_n

 

12138620_10206997608711248_1020123572751842158_o